Najmanje 12 nepalskih alpinista poginulo je u snježnoj lavini koja se jutros obrušila na padinama Mont Everesta, rekli su zvaničnici.

"Pronašli smo 12 tijela, a spasili sedam lica", rekao je portparol nepalskog Ministarstva turizma Mohan Krišna Sapkot agenciji Frans pres i dodao da se i dalje traga za pet alpinista.

Lavina se obrušila na visini od oko 5.800 metara duž maršrute koja se koristi za osvajanje najvišeg planinskog vrha na svijetu.

Do nesreće je došlo rano jutros, kada su nepalski vodiči otišli da zategnu užad za stotine onih koji pokušavaju da stignu na najviši svjetski vrh.

Eksperti kažu da je ovo najveća tragedija u istoriji alpinizma na Himalajima.

Mont Everest se nalazi u Tibetu blizu granice sa Nepalom i visok je oko 8.848 metara.

Zaključno sa 2006. godinom, na vrh se popelo 2.062 ljudi. U pokušajima osvajanja je nastradalo više od 200 osoba.